《華爾街日報》記者珀爾在巴基斯坦被殺，證明記者係一行危險職業。美國人、猶太裔記者到回教國家採訪，更加係高危行為。正所謂冤冤相報何時了，猶太人與中東回教徒嘅二千年仇恨唔通真係要糾纏到世界末日？珀爾太太嘅聲明要求美國不可為報復而報復，表現咗佢嘅寬恕心，令人感動，值得小布殊重視。
珀爾被殺嘅消息傳來之日，餐廳羅傳真一則美國黑色笑話，笑話本來幾幽默，但適逢珀爾被殺，自己都笑唔出。波斯灣戰爭英雄Schwartzkopf將軍被問到，美國人可否寬恕與策劃九一一襲擊有關嘅恐怖份子，史將軍答：「寬恕係上帝嘅職能，我哋嘅工作係安排佢哋（恐怖份子）見上帝。」
記得九一一之後，好多美國人問電視主持人：「上帝點解讓咁殘忍嘅事發生喺佢嘅信徒身上？」主持人（包括拉利京）答得好辛苦，後來要搵神父、牧師上陣。所有宗教都提倡信義和平，偏偏世間最難以解決嘅仇恨就係宗教與宗教嘅戰爭，左丁山唔係教徒，難以理解。
餐廳羅前一輪為戶外加設咖啡茶座而大傷腦筋。阿松哥與旅遊發展局唔係大力倡議戶外露天茶座嘅咩？原來食環署有一條古老規例，就係樹木之下唔可以擺座位。呢條例你聽過末？阿松哥想推廣旅遊，睇怕要逐條古怪法例睇真吓至得。