港股噚日借期指結算一度勁升210點，升至10757，成交多達78.35億元，午市有回吐，唔知係咪因為大戶結算完就算？不過黑客話，美股周三如再挾高，到時港股好難唔跟美股升，淡友今次平晒倉之後，下月將會造好倉，所以不宜太過悲觀，縱使香港經濟真係好悲。
聯想（992）噚日高調邀請傳媒北上，宣布發展大計，市場人士隨即憧憬聯想有重大公布或好消息，有理冇理炒咗至算，刺激聯想股價一度急升4.7%，最終收報3.30元，上升3.1%。不過，原來聯想只係藉住變相收購廈門華僑電子生產線發展手機業務。有芬佬話，國內移動電話市場已有放緩趨勢，手機市場亦會受到影響，前景唔算好樂觀，況且中國加入世貿後，外國品牌手機可以進入中國傾銷，國內低檔品牌隨時俾人㩒住砌。
若果大家重認為與國際巨擘簽合作協議就有得炒，咁就要留意長城科技（074），因為此股將同IBM簽合作協議。不過Cookie話，唔少大行已經無睇呢隻股好耐。
鴻興印刷（450）近期升勢凌厲，噚日重上4元水平。i師傅話，此股都係一隻美國經濟復甦概念股，經過911事件後，去年11-12月定單開始增加，且趨勢持續，因此有基金密密收集。此股PE8.4倍，在工業股中叫做貴，不過勝在股息率高達7厘，適合穩健投資者。不過此股已由911後低位2.65元反彈超過50%，都咪話無風險。