職業足球員壽命短暫係人都知，唔少球員都會鋪定後路等退休嗰陣發展。不過，好似國腳宿茂臻咁進軍傳媒辦報紙，都算係中國足球史上第一人。
話說宿茂臻成立嘅公司喺濟南工商局成功註冊後，一直係經營運動用品，包括發展健身器材，但係「老宿」希望公司發展方針朝向同佢老本行足球有關嘅嘢，結果出現唔少阻滯；直到一月佢間公司同山東《體育晨報》合作，負責經營同發行旗下一份名為《足球博彩》報紙，實行食住國內足球博彩熱潮大搞波經，又設立估波擂台，搵埋其他國家隊隊友客串。
聽講「老宿」喺第一期贏過李霄鵬成為台主。唔單止咁，宿茂臻重計劃想借助他當年喺英曼聯學法嘅恩師卜比查爾頓，邀請佢老人家拔刀相助，連「紅魔」領隊費格遜都係佢力邀對象。「老宿」咁有諗頭兼肯作新嘗試，我求大俠都要寫個「服」字！
腰纏萬貫嘅溜馬球星米拿，竟然俾佢母校洛杉磯大學追債，但為乜欠債？欠債若干？該名校就無可奉告，米拿知道母校為欠債一事唔肯印證佢喺八七年攞到歷史學位就更加𢱑晒頭，究竟今次係錢財轇轕或係因過期還書，抑或未畀泊車費，真係只有佢哋兩個知嘞。
我求大俠收到風，話曼聯後衞加利尼維利最近失戀，俾佢女友漢娜撇咗，而最慘就係鍊贏佢嘅唔係乜嘢公子哥兒，竟然係個窮書生。鬼咩，加利仔季初喺球場上踢到失失慌，成日累曼聯輸波，可能連漢娜都頂佢唔順，結果咪同佢分手囉！不過，唔知係咪加利仔化悲憤為力量，佢近排的確踢得好咗，重俾英國啲球評家讚佢轉型成功（由右後衞改打中堅）㖭。
有傳話未喺英超踢過一分鐘嘅稻本潤一，將會俾阿仙奴以蝕本價二百五十萬鎊賣番畀大阪。唔好話我求大俠賣花讚花香，我哋啲中國人真係好醒，好似范大將軍同楊晨咁，雖說佢哋效力嘅鄧地同埋法蘭克福個朵唔響，但係起碼有得踢先呀，唔學似啲日本球員咁，連落場嘅機會都冇。如果稻本潤一當日係加盟啲名氣冇咁大嘅球會，或者唔會搞成咁！
求驗客手記逢星期一至五刊出
E-mail: