容祖兒（Joey）昨日拍攝~H2O+廣告，對於趙薇和黎明fans的瘋狂行徑，Joey亦感同身受，她謂有fans要脅她回信，否則食山埃自殺，而信內竟有不知名的粉末。
容袓兒（Joey）往日本進修，前日再度返港，昨日已馬不停蹄再次投入工作，以白恤衫配牛仔褲，一身飄逸打扮在屯門軍營拍攝新一輯~H2O+電視廣告，此廣告將會是~H2O+於內地首個播放的電視廣告。
Joey被問到有趙薇內地fans服毒自殺，及有黎明瘋狂fans要與黎明同歸於盡，為了希望佔有偶像而做出一些可怕的行徑，Joey說：「其實fans同歌手之間最健康嘅關係，應該係互相鼓勵，而唔係佔有，我都試過有fans搵我簽名，支筆差啲插到我條頸，都幾恐怖。重有每次佢哋拍玻璃，我都好驚會打爛玻璃，所以真係好矛盾，因為好開心啲fans鍾意我，但又驚啲fans危險。」
而Joey的經理人霍紋希亦馬上補充說：「我哋之前都收過祖兒fans寄嘅信，內容重話如果Joey唔覆，就會食山埃自殺，佢又話已經食咗少少，我哋即刻帶番手套處理封信，都唔知嗰啲粉末係乜！」
此外，Joey往外地進修二十二天，兩度返港，似乎不專心進修，Joey說：「因為有嘢做，所以先返嚟，而且我搭啲航班係要喺香港轉機，我自問已經利用晒啲時間，冇期望自己會即刻變天才，再加上呢兩年半都冇放過假，好似井底之蛙咁，冇睇過外面嘅事物。」