保安局局長葉劉淑儀出席較隆重嘅公開場合，一向都悉心打扮，珠光寶氣，但原來葉太對珠寶首飾都好有研究。噚日葉太主持香港國際珠寶展，直情係「開正佢嗰瓣」，佢差唔多用咗四十幾分鐘時間參觀全場，又要求大會帶佢睇埋「南洋珍珠拍賣會」，慢慢欣賞一條底價一百萬港元嘅珍珠鏈，佢重拎起其中一粒話：「都好重吓喎！」
葉太喺展覽期間睇咗好多珠寶鑽飾，包括四十幾萬嘅珍珠鏈、六十幾萬嘅鑽石鏈等等，而且重同啲參展商對答如流：「係呀，近來鑽石平咗呀，重有呢款平啲嘅鑽飾啱晒O.L.（辦公室女郎）呀！」睇吓葉太噚日頸前嘅別針就知佢有興趣啦，係用七粒南洋珍珠襯鑽石配成，好搶眼！但葉太都不忘推介本地貨，經過一間本地公司攤位時，狂讚本地設計嘅鑽表手工精美，重話「第日我嫁女搵你哋幫手！」睇嚟葉太真係好錫個女，點解？因為啲鑽表好貴，其中一隻要成七十幾萬港元！
（圖）葉太噚日喺珠寶展拎起條價值幾十萬嘅珍珠頸鏈，睇佢嘅笑容，就知佢有幾咁鍾意。 李家皓攝
E-mail：