過往數碼產品都會依價錢劃分高、中、低級數，貴機有專業功能，平機則簡單易用，不過呢個慣例將會被打破。Canon日前在記者會上，一口氣公布三部數碼新產品（數碼相機、掃描器及打印機），雖然各自加入不少新技術，令人有點眼花撩亂，不過所有新產品都有一個共通點，就係將高級、專業之數碼技術，加入民用級機種上。
記者、攝影：徐影龍
ImageGirl：Natalie
佳能銷售(香港)
查詢電話:23012468
在記者會中最重點產品，可算係呢部A40數碼相機，因為Canon為呢部民用級機種，加入唔少專業功能，最特別係ISO感光度，市面上大部分型號機種只提供100至400數值選擇，而A40則額外設有ISO50，令相片微粒更幼細，拍攝效果更為細緻。不過使用ISO50時必須在良好光源情況下才有好效果。
三點對焦新手啱使
身為民用級機種，當然唔少得簡單易用之特色。A40新加入三點人工智能對焦系統，自動從三點中揀選相片正確對焦位置，拍攝新手都唔怕會難於對焦。
鏡頭方面，採用f2.8大光圈，可作三倍光學變焦（35mm-105mm），A40還提供有320×240、240×120兩種解像度記錄模式，以AVI格式儲存，可同時收錄埋現場聲音。同場中展示各款A40周邊配件，最特別係防水機殼，因為能全部使用番A40之按鍵，可靈活在水中作拍攝，可惜推出日期未定。
當年USB制式由Intel及Microsoft等七大公司訂立，其兼容性及方便程度令其變成電腦必備插頭之一，自公布USB2.0制式後，用家一直期待比舊制式快40倍之超速傳輸，可惜暫時只有較高階之電腦產品採用USB2.0。
Canon公布新型號掃描器中，便首度將USB2.0加在民用級機種上。呢部D1250U2F光學解像度為1,200×2,400dpi，48bit色深掃描能力，應付家庭用家或辦公室足夠有餘，尤其係掃描速度表現，一張A4尺寸相片以48bit色深掃描，舊USB制式需時八分鐘有多，而D1250U2F則低於兩分鐘，差不多快四倍，而600dpi掃描的話更只需30秒，掃描高解像相片不再是苦差。
1250U2F內置燈箱，除機前三個一按即Scan快捷鍵外，面蓋額外加入掃描菲林快捷鍵，賣價$1.988，若嫌賣價稍貴，可選擇同系列的D1250U2（沒有燈箱），賣價$1,388。
在打印機方面，新機型號為CanonS200SP，除具備目前全球最高解像度之2,880dpi外，在色彩重現上作出突破，加入之VividPhoto技術，便能打印顯示屏表達之色域（ColorSpace）範圍以外之顏色，尤其在藍、綠兩色上，所以打印風景相片效果會更加明顯。
除突破打印技術外，S200SP之墨盒亦採用Canon特別研製之高濃度防退色墨水，若配合專用打印相紙（PhotoPaperPro），可令打印成品保存長達25年時間，比真正相紙會更加耐用。