聽日阿董「鐵定」當選，八方覺得反董大聯盟的絕食行動就好似唐吉訶德一樣，向不可能的事挑戰，呢種勇氣真係值得敬佩。噚晚八方去到天星碼頭，見到佢哋鬥志高昂，重可以自得其樂。
卿姐坦言今次係第一次絕食，因為八九十年代絕食活動最多的時候，卿姐當時還是記者身分。
第一次絕食對卿姐來說並不好受，因為佢本身「好為食」，同何俊仁等絕食「老行尊」自然冇得比。
另一位反董聯盟核心成員鄭家富雖然在場，但竟然冇綁黃絲帶一齊絕食。原來對上一次五十小時絕食行動之後，鄭家富胃痛到入院，醫生警告佢以後咪試，唔係好易胃出血，所以今次佢只可以做阿四，幫手執頭執尾。
而李卓人聽到竟然一啲同情心都冇，重笑阿富要換咗個醫生。阿人又講笑，話絕食期間一定冇得偷食，因為全程都有班專鬧反董人士嘅維園阿伯在旁監視住。
八方又意外撞見韓東方六點幾到場打氣。唔好以為選特首唔關佢事，唔講大家可能唔記得，原來佢兩年前已經攞到特區護照同香港永久居民身分，絕對係香港嘅一分子。不過，工運始終係佢老本行，一見阿人就雞啄唔斷。
E-mail：