本周美股大反彈，杜指周一周二共升302點，港股則跌117點，唔通港股真係扶唔起嘅阿斗？睇番轉頭，淡友真係有運，如果唔係咁啱港府公布一連串利淡經濟數據，將成個香港前景描到灰一灰，今個月期指戰果或者要改寫。
地產股近幾日突然走晒樣，大行愈沽愈急，睇怕去年11月買上嚟該批獲利貨已沽到尾聲。由陰謀論角度睇，大地產商亦樂意喺新財政年度賣地前見到市道稍回，有機會執平地。由97年金融風暴至今，大地產商不斷話樓價見底，再無大跌空間，可惜都係「狼來了」，希望今年真係可兌現。
上落市要識走位，美股升近10200重大阻力位，回頭機會大過繼續上，港股噚日唔大升係有原因。滙豐（005）亦反彈近短期阻力位，揸咗滙豐Put輪要準備跳車，但滙豐升唔番上50日線（現處89.60元）之前，技術走勢仍偏淡，升唔穿50日線可以再沽過。
炒波幅要講耐性，上實（363）近期展開調整，50日線15元若守得穩，不妨再上車。相反如確認50日線失守，則宜先計數。