馬年各位女士最大喜訊，莫過於葉劉淑儀公開她的減肥餐單了。話說保安局局長葉劉每年新正頭，都請八方同班行家去跑馬地馬會滿貫廳春茗，今年都唔例外。不過，八方坐喺葉太旁邊，見佢用膳時十分小心，絕不沾甜品、糕餅及米飯，於是有行家多口笑佢係咪因為瘦身成功，所以要繼續戒口。
葉劉果然坦白，笑說自己一向積極Keepfit，但發現做gym冇乜用，所以改為節食。佢重好詳細謂每日用膳嘅公式，連呢點私隱都公開，真係透明度高，服咗佢。
各位讀者如果有興趣，都可以試吓。葉太話好快見效，啲脂肪一吓子冇晒，半年內體重由一百二十四磅減至一百一十四磅，大嗱嗱十磅，又幾好嘢，八方或者都要試吓。話口未完，八方已食晒杯綠茶布甸，葉太嗰杯則依然原封不動，佢一邊劃口紅，一邊宣布用膳完畢，多謝各位。
E-mail：