港股噚日又冇跟足美國股市升，地產股繼續俾人插，長實（001）跌2.6%，收66.75元，成交誇張到高達10億元，全日係咁俾歐資盤質，絕對係一個被洗倉嘅格局。雖然滙豐（005）與中移動（941）表現較理想，不過在高位都俾美資質，特別係大摩沽盤都唔細，大家唔好對後市有任何奢望。
佑威（627）近期表現都算相當出位，噚日又升5.2%，收報0.61元，創出歷史新高。不過，成交金額比較反覆，一時有數千萬，一時只得幾百萬。
黑客話，據講此股早已被人收得一乾二淨，成交亦主要係交來交去，冇咩特別參考價值。由於幕後人士頗具實力，暫時唔輕易爆煲，但股價若再持續上升，就可能會配股，因為佑威本身手頭資金唔多，只有5000萬元左右，只係今年計劃嘅投資就接近4700萬元。聽聞最近公司與第三者傾緊一個合作項目，要使唔少錢。
耀生行（290）大股東噚日宣布以逾6000萬元出售28%股權，每股作價1.08元，較前收市價大幅折讓36.5%。
理論上應該對耀生行股價有大壓力，但原來買家係東聯（1182）大股東韓光明，由於東聯曾經有過輝煌戰績，所以令到唔少炒家充滿憧憬，入市企圖搭順風車。不過，大家要留意一個日子，就係交易完成日期為3月6日，過咗呢一日，即係話買家可以沽貨。耀生行噚日收2.125元，即係話韓生嘅投資，帳面已賺5852萬元，接近1倍。