小布殊訪華，到清華大學演講，當然係精心安排。美國方面，上次克林頓到過北大，小布殊自然唔肯跟風，而北京除咗北大之外，重有邊間值得佢去呢？此外，江澤民嘅「準接班人」胡錦濤係清華校友，小布殊由佢陪去清華，培養感情，你話呢個藉口幾咁圓滑。但有一筆不可不提嘅，就係「準接班人」未登大寶之前，就俾美國佬咁重視，實在犯忌，江澤民和其他中共高人看在心裏，對胡錦濤冇乜好處，希望左丁山係烏鴉口啦。
清華嘅黨委書記當然亦精心安排一班「思想正確」、學有專長嘅精英生去聽演講，刁難布殊；但睇起嚟，啲問題一啲都唔夠tough，美國政客點會唔識答吖，佢哋久經競選磨練，答呢啲問題當食生菜，有啲清華生用英語發問，布殊讚佢哋英文好，香港學生唔使歎服減自己威風噃，如果布殊訪港，到中大或港大演講，由左丁山挑選三百五十名學生去聽去問，佢哋一定講英文好過啲清華生。事實上，左丁山聽過幾位唔入清華?北大而落咗嚟中大嘅學生講英文，佢哋講得更加流暢。
清華大學英文叫TsinghuaUniversity，北京大學叫PekingUniversity，乃係尊重傳統嘅表現，一啲老友玩政治正確，以為應該寫Qinghua、Beijing，實在係烏垂垂。