在日本有十五年歷史，有三十多間分店的魚一丁刺身居酒屋，第一間海外分店自數月前進駐香港銅鑼灣後，店舖每晚都擠滿等食之人，唔想再等？無問題，事關第二間分店已經在世貿中心靜靜地開幕了。今次除了繼續大賣抵食夾大件的北海道料理外，同時亦有數款新菜登場，訂位前一於先睇睇有咩必食之選！
記者：黃婉冰 攝影：陳穎
由日本運來黃豆在香港自製豆腐，其特點是豆味唔重，所以做出來的豆腐滑溜溜，另有忌廉芝士粒、生菜、青瓜絲、番茄粒、炸日本腐皮，淋上自家秘製的芝麻醬，點止豆腐咁簡單？
入口芝麻醬已經突圍而出，芝麻香味令人愈食愈想食，日本腐皮薄而香脆，豆腐滑得來質感較重，有咬口，唔會入口即散。
北海道盛產海鮮，各款魚生當然唔少得，這款刺身盛盒集九種不同刺身，分別有三文魚、吞拿魚、油甘魚、鱲魚、帶子、八爪魚、甜蝦、魷魚、蟹膏麵豉，味道有濃有淡，其中蟹膏麵豉由北海道運來，以松葉蟹膏製成，味道同蝦膏差不多，無蝦膏咁濃味。
分量好足，最啱幾個人一齊分享。一碟有齊濃、淡兩種魚生，可以各取所好，若嫌蟹膏麵豉味道過濃，可以塗在青瓜上一齊食，效果不錯。
三月新菜式中有這款油甘魚BB活魚料理，屬於白魚類的油甘魚脂肪較少，身形細細，最適合用來做活魚料理。要食出鮮味，師傅特製檸檬醋代替豉油、芥辣，帶出魚香，剩低的魚頭魚骨記得畀大廚幫你用來煲麵豉湯，免費㗎。
魚肉偏向爽，味道亦較淡口，檸檬醋比普通的酸汁更酸，愈食愈開胃。
日本人視之為寶的魚安魚康魚被師傅煎皮拆骨，以豉油、清酒、薑汁醃過，蘸滿炸粉炸至金黃，食時只需滴少許檸檬汁，香濃惹味，最好當然係做送酒小食！
外表炸得香脆，唔會油淋淋，魚肉嫩滑鮮味，但魚味唔算太濃，肉質咬落有少少同普通魚唔同。
師傅話做日式煎蛋卷最能睇出師傅手勢是否正宗，由多層蛋皮叠成的蛋卷，要煎得香滑唔鬆散先係最高境界。雞蛋加入木魚水，令蛋卷入口更滑，跟足日本人傳統食法，加蘿蔔茸、豉油，可以幫助減低油膩感。
叠得厚厚的蛋卷，即叫即煎熱辣辣，未食已聞到陣陣蛋香，入口蛋味重且夠滑，每條都有成吋厚，難怪要夾蘿蔔茸一齊食，否則食完兩三件個肚都要投降。
日本人鍾意食無餡湯圓，只會在糯米內加入不同味道，白色代表原味，綠色代表綠茶味，粉紅色代表花味，在糖水中央的並非芝麻雪糕，而是紅豆茸，伴以蘆薈、芒果，就成了日本版「芒果撈野」。
綠茶湯圓味道最濃，櫻花湯丸入口時有清香花味，咬落若隱若現，蘆薈清甜，湯圓細細，整體來說不會太甜膩，幾有特色。
電話：28827468
地址：銅鑼灣告士打道280號世貿中心商場3樓312-313號舖
座位：167個
營業時間：上午12時至下午3時，下午5時半至凌晨12時。
付款方法：現金及信用卡(Visa,Master,Diners,AE)