張國榮（哥哥）同好友唐唐、陳奕迅加埋周啟邦夫婦等，佢哋都有幫襯開張堅庭做老闆、喺跑馬地嘅「頂好粥麵世家」特價雲吞麵。
「頂好粥麵世家」生意幾好，最近佢哋又喺中環開咗間叫「頂好餐廳」嘅分店。中環分店今日正式開幕，張堅庭夫婦同周啟邦夫婦都會出席剪綵儀式。
據知張堅庭係「頂好粥麵世家」嘅大股東，日常業務由佢啲親戚打理，所以上次跑馬地店開幕或者係平時，都有見佢同老婆去幫襯。
新店裝修用咗四百萬㖭，希望吸引中環上班一族幫襯。餐廳負責人林先生噚日重話，新張期間特別推出三款特價麵餐，有雲吞麵、豬手麵同炸醬麵配餐茶，二十蚊就搞掂。
嘉禾今年賀歲片《嫁個有錢人》搵鄭秀文擔正，部戲拍得普通，一樣勁收，就證明鄭秀文（Sammi）有票房保證。𠵱家Sammi嘅片酬叫價四百五十萬，一樣有好多公司爭住搵佢。嘉禾已經想搵佢再簽多兩部戲，只不過Sammi已經接咗關錦鵬部文藝片，其他電影佢就想慢慢睇完劇本先接。佢都唔係蠢㗎，知道再為錢亂接戲就會好快玩完。
李惠敏（Amanda）前晚同朋友喺跑馬地食飯，佢成個頭重染成橙紅色。佢呢個橙紅頭，可以講係鴻運當頭。噚日馮仁昭打電話畀Amanda，佢話：「呢排髮型流行橙紅色，我又想轉吓髮型配合新款化妝，橙紅色都幾襯我嘅膚色呀，加上又有新鮮感，咪試吓囉！」
好多明星收到fans送嘅禮物，通常會好快丟咗去，但馮仁昭知道梁朝偉唔會咁做，因為佢屋企有間房用嚟放fans禮物。好似偉仔早前喺內地宣傳電影，佢都會叫公司同事幫佢帶fans送嘅禮物返香港。
由韓國女星全智賢主演嘅韓片《我的野蠻女友》在港上畫，票房都收得幾好，前日單日票房收咗八十五萬，僅次於單日收九十萬嘅動畫片《怪獸公司》。《怪》片票房總累積有二千三百四十萬，而《我》片上咗四日就收咗約三百萬。
莫文蔚同馮德倫拍拖，其實行內一早已經有好多人知。不過佢兩個嘅感情唔算話好成熟，加上唔想成日俾人問感情事，所以佢哋兩個先會對呢段情咁低調。而二十七歲嘅馮德倫年紀雖然細過莫文蔚四年，但聽聞佢都幾緊張呢段情，不過雙方有默契唔講感情事，當然要尊重對方。