老董成功自動連任，自然就要四圍曝光，搞吓形象。噚日佢就上亞視接受「百萬富翁」陳啟泰訪問，今次唔講連任後有乜鴻圖大計，反而係閒話家常，講咗佢好多鮮為人知嘅事，好似除咗係球迷外，鍾意靚酒之外，重曾經相當沉迷打麻雀同打橋牌，好彩佢後來戒咗，唔係做咗特首重俾人話係「爛賭二」就大件事！
另外，原來好多人話佢開工時間係「七、十一」，但正確係「四、十」，每日只係瞓六個鐘，四點就開工，所以阿董太要佢休息，只好用班孫仔孫女過橋，話孫仔孫女入晒粉嶺別墅玩，阿董就會乖乖地入粉嶺弄孫為樂兼休息！
講到家事，就冇理由唔講佢伯爺、船王董浩雲，佢話一直唔知爸爸好關心佢，直到爸爸過身，阿董睇番伯爺本日記，先知父愛偉大，阿董重話佢伯爺帶佢周遊列國，佢見到好多政商界名人，從佢哋身上睇到三樣成功要素，第一係一定唔好貪心，第二要知人善用，第三要審時度勢，因為好多時人力係扭轉唔到個大勢。
但八方睇番佢五年施政，起碼犯咗「貪心」一條，每個施政報告開一大堆期票，又要搞呢樣，又要搞嗰樣；論到知人善任，只係睇佢用路公公就乜都唔使講！唯一佢真係做到，就係審時度勢，香港有乜事，都係金融風暴的事，同佢個人完全無關。
其實，老董今次接受陳啟泰訪問都算出晒位，亞視當正係娛樂新聞咁做，叫阿「百萬泰」訪問佢。以往其他傳媒機構訪問老董，都係新聞部出手，今次由節目部做，除咗好似話「百萬泰」係佢個仔小學、中學同學，打埋算盤都係世姪之外，好處就係唔使講政策，避免又出現上次去無綫做訪問，無情情爆咗「『八萬五』不再存在」的尷尬局面，重可以硬銷吓溫情。話就話亞視主要觀眾不在香港而在珠江三角洲，但等祖國同胞睇吓我哋有個幾溫情嘅領導人都好。
E-mail：