星期三期指結算，淡友唔理美股回升，照樣出擊。長實（001）及和黃（013）領跌，唔知係咪淡友嫌和黃收購環球電訊有阻滯都唔夠力，竟傳城中猛人抱恙，似乎黔驢技窮。
不過噚日大市氣氛的確差，上個禮拜趙飛雲提過覺得大戶沽貨好有韻律，如果沽長和就唔沽滙豐（005）及中移動（941），好似唔想個市跌得太急，但噚日就已經無法再掩飾，連近期相對較強勢嘅太古A（019）及恒生（011）等亦沽壓大增，跌穿50日線重要支持，如果噚日唔係滙豐跌得少，恒指唔止跌169點。
近期樓盤銷售理想，地產股上周初表現仍硬，但一連串利淡香港經濟數據，如失業率創新高，港府財政出現結構性赤字危機，通縮持續上升等，令投資者睇淡香港經濟前景，沽售地產股。睇番最有代表性嘅新地（016）日線圖，由大圓底變成小圓頂急挫，真係陰功。噚日新地以大成交跌穿60元，呢兩日唔抽番上62.50元之上，下試55元機會極大。
藍籌將進入公布業績高峯期，對手頭有閒錢者可能係一次低吸機會，趙飛雲個倉以現金為主，當然會準備伺機出擊，新地係主要目標之一。