相信老一輩嘅車迷，都應該聽過福特GT40呢部戰車，當年喺賽車場上嘅豐功偉績；而喺年初舉行嘅美國底特律車展上，福特廠方就展出咗全新名為GT40Concept嘅概念車，因而獲得不少車迷嘅掌聲，而新車亦有望於明年正式推出㖭。
呢部GT40Concept跑車，造型與當年嘅GT40相近，同樣來得極富跑味外，前輪18吋及後輪19吋嘅闊大輪胎組合，就最能將其跑車形象徹底地展露出來；而車尾闊大嘅死氣喉配搭，更能讓駕駛者可有置身於落場用戰車之感㖭。車廂布局方面，福特廠方就為其裝上一雙桶形跑車座椅，承托力甚高之餘，內裏更裝有不少鋁合金裝飾，望落真係好有型㗎。
而新車所採用引擎配搭，係一台5.4公升V8引擎，並附加有Supercharged系統，因而令馬力及扭力輸出數值，分別高達500匹及69.1kgm，匹配一台6前速Close-Ratio波箱，更能令新車可有不俗嘅性能表現。有興趣嘅朋友，就要留意一下佢嘅推出日期喇。