港股噚日繼續唔跟美股升勢走，恒指大跌169點，連10500都失守。Cookie話，噚日外資主力掟銀行與地產股，因為信用卡拖欠壞帳比率升逾8%，反映香港失業情況嚴重，勢將進一步影響到樓市，所以噚日地產股全面大跌，來自大好友瑞銀華寶嘅沽盤都唔少。
經濟復甦概念股表現較為硬朗，如利豐（494）逆市上升近1%、德昌電機（179）亦升逾1.1%，品質國際（243）更加勁升5.4%㖭。
市場有消息話，品質旗下樂依文業績將較預期好，同時又傳出公司準備配股集資，所以有人托價。
中電（002）中午公布01年度業績，純利增長逾25%勝預期，刺激股價由低位反彈，但其後發覺盈利增長因為地產收益入帳水平偏高，並非核心業務有改善，傳聞美資行即刻減持，股價最終倒跌0.65%。
不過，另有芬佬話現時港股乏善足陳，中電派息慷慨，可以掃番啲套息，而且中電在國內售電量上升，海外投資正在增長，前景唔差，今日會隨時反彈。
華德豐（297）嘅飛天朱近期頻頻話會承擔公司債務，又話有基金希望入股，重話將收購衛星業務等。不過講咁多都重未有動作，投機者似乎聽到厭。
據聞確有投資銀行想幫華德豐配股，不過傳老朱開價要1元以上，以噚日收市價0.63元計，相信要有大力士肯出手相助，將股價大幅托高，飛天朱至可實現股價飛天夢想。