時裝名牌的魔力無遠弗屆，但名牌行貨往往數量少需求多，WaitingList水蛇春咁長，真係得個恨字。所以好多人都唔介意執二攤，會到二手店內搵絕版或剛被出賣的新款，加上價錢又較低，無怪乎賣二手袋的店舖日日人頭湧湧似擠提。「最Hit嘅款，一擺出嚟唔使30分鐘就賣咗㗎喇！」一位名牌二手袋店的負責人透露。咁至搶手係邊個牌子？原來又係紅到發紫嘅LV。
記者：梁珮瑜 攝影：陳盛臣
第一位
各大二手店一致公認，至搶品牌必選LouisVuitton，其中經典Monogram更是大熱貨色，人客十居其九都係搵佢。
第二位
自Dior改革玩年輕，其潮流配件成追捧項目，大大隻DiorLogo的手袋更是搶手貨，成為二手店內的新寵。
第三位
Gucci袋中以GGCanvas最受歡迎，其中小手挽更是OL至愛，較為新淨二手貨一出即賣罄，穩定需求成為好賣第三位。
現場直擊
訪問了多位剛步出二手名牌店的女士，大部分都話有幫襯過買二手袋，而講到最愛品牌，大多都話係經典長青又保值的LV。
LV、Dior同Gucci今期當紅就多人搶，咁有邊個牌子或款式坐冷板，超值二手價都無人吼？綜合各大二手店舖投票，結果分別有Prada袋、圓桶形索綁LV及珠片Fendi手挽袋。Prada人氣回落跌價好正常，而索綁LV袋就款式老氣被人嫌棄。至於珠片Fendi則太誇張兼價錢較貴，去Ball先啱用唔夠實際。
為追款趕潮流，好多人都會到二手店放賣名牌袋，折現後買過個新袋。但就要留意二手店回收手袋的一套準則，留意以下幾點就包你個袋更值錢。
●Basic款式最多人要，回收價格亦較高。例如LV的舊花Monogram款式。
●今季新款通常放價較高，所以買咗唔鍾意就唔好用咁耐，趁重興緊就要放賣。
●有明顯Logo花或大大個Logo扣的款式賣價會較高。
●買袋單據要保留，放賣時能出示會更好。
●愈新淨賣價愈高，要好好保養個袋才值錢。
售賣點：
二手站(24271111)
尖沙嘴彌敦道100號東英大廈商場G18舖。
米蘭站(27308037)
尖沙嘴漆咸道南81號地下H舖
巴黎站(23693319)
尖沙嘴漢口道12-12C號地下G舖