耀科國際（143）自從受傳聞困擾之後，股價一度被質，但自從傳出找來舊相識高手相助之後，近期股價似乎好番啲，據講高手計劃唔止咁小兒科。
耀科自從傳出有高層在內地有麻煩後，股價由60至70仙水平，最低質到落28仙，但喺30仙附近企得幾穩陣，加上要沽嘅都沽得七七八八，問題係未知高手究竟收齊貨未？
小初其實好想知道，點解喺傳聞傳得最勁之時，大股東始終都冇現身，反而以有病為理由辭去主席一職，由佢細佬坐鎮，搞到外間嘅疑團一直揮之不去。經紀陳話箇中原因，佢亦唔知道咁多。
不過，佢就話知道高手本身都好叠水，以往耀科上市之初，股價如坐直升機，佢都出過唔少汗馬功勞，今次佢肯崔護重來，為隻股再效命，相信股價重有機會升。
但小初就覺得，除非有關疑團可以解釋得清清楚楚，否則陰影仍在，炒都炒得唔自在。