今時今日，做地產代理真係要「周身刀張張利」先至得，所以大家都自我增值，好似中原地產荃灣綠楊B組嘅邱漢偉，響中原做咗3年，不斷將一手盤資料輸入自己部PDA，靠呢啲資料做咗唔少生意，佢嘅成績一直唔錯，上個月為公司搵到17.7萬佣。而佢上司陳忠燕亦用PDA做成咗唔少轉租為買個案。
戴德梁行噚日與傳媒飯局，席間身任測量師學會產業測量小組主席嘅林增榮透露，該會正與新西蘭商討互認資格，而內地則希望可在今年內成事。
其實該會之前已與英國、新加坡及澳洲達成互認資格。以後該會成員將有更多地方可一展所長。
由於住宅樓價反彈乏力，所以炒賣未成氣候，但個別投資者仍不惜火中取栗，短線炒賣賺取微利，聽聞屯門區一名投資者於區內吸納咗6至7個時代廣場同屯門市廣場嘅平價單位，然後再以市價沽出，每單位賺價約3萬至5萬元。不過，經過97年金融風暴一役，投資者即使短線投機，也以不犯本為原則，否則隨時輸突兼「一鋪清袋」。
蘭西