曾經以為自己對唔會生小朋友的意向非常堅定，但最近被兩件事動搖了這個想法。
好友張達明一索得男，出世時爭少少有八磅重，營養一流。
達明一向都係一個自由自在、不通世務嘅大細路，曾經懷疑過他是否有足夠準備做爸爸，及至到他家探訪當日，只見他與新生嬰兒一起躺在梳化上會客，一邊與我們傾偈，一邊輕掃嬰兒的頭殼，一臉慈父本色，令我心中突然湧起一股恨做爸爸的衝動。
小嬰兒全身軟軟的像是麵粉糰一樣，額頭有一個微凹的位置，應該是傳說中的「腦囟」位，伸手想去摸，但遭達明出手攔截，他說：「要摸就去摸黃秋生，佢腦囟到𠵱家都未生埋。」
愉景灣最近的一個新樓盤廣告，着實出色。廣告中記錄了一個父親與兒子的一些生活片段，很有感染力，令人很想緊抱兒子，奉獻一切，令兒子有一個十全十美的童年。
已有一子的朋友告訴我，看着兒子長大，就像目睹自己以前細個嗰陣一樣，感覺很過癮，但想生小朋友之前，除了要細心考慮是否有足夠的愛之外，還要有足夠的金錢儲備，否則終日營營役役，抽不出時間享受父子樂，生嚟都係嘥氣。
張達明是小富翁當然沒有問題，但我等升斗市民餐搵餐食餐餐清，睇嚟都係再睇定啲好。