美股上禮拜五彈升，港股則嚟一個反底，恒指由升變跌，重要跌169點，有Call輪在手者認真慘情。
有傳聞話某名人大亨抱恙，傳到有咁嘅消息，個市應該差唔多矣。恒指最低10468，同2月7日最低位10393相差唔遠，有機會見底止跌回升。期指明日結算，由低水64點變為輕微高水13點，淡幫「搵夠」，結算後有可能由做淡搵食變做好搵食。
昨日散得最緊要嘅係長和系Call輪同埋新地Call輪，跌15%至24%嘅有好多件。
博大市反彈，博大人物抱恙傳聞無疾而終，搵Call輪埋手，最好揀啲成交大嘅長和系Call輪，例如長實Call輪9063，呢件成交最勁，47球易手，昨日散19%；想波幅大嘅則揀9043。和黃Call輪則揀9050，亦係成交最勁，計數買輪則揀9097。
如果想買市唔買股，則揀恒指Call輪9045。隻輪收16.2仙，散12%，7月到期，溢價6.5%，槓桿率14.4倍。恒指彈番百幾點，輪價會彈番十幾個巴仙。