近日同班銀行家老友拜年，佢哋都好擔心份工，因為去年興合併，合併嘅必然結果一定係裁員，分別只係裁幾多；比如兩間銀行，有兩個保安主任，變成一間，是但一個要走。佢哋話今年連開工利是都冇，老細又放風話要瘦身，一啲都唔樂觀。
噚日又傳出恒生推出「自願退休計劃」，八方打電話問恒生大公關，佢話已經出咗聲明，就係「該報道並無事實根據及不準確，本行沒有是項計劃」。至於其他，佢就話業績公布在即，唔方便講。
八方搵老友八，佢笑笑口話，恒生就算要裁人，都唔要搞「自願退休」，因為對股東不利。呢個大概係員工一廂情願嘅構思，咁嘅形勢，炒你就炒你，重畀着數？你估公務員咩。諗落又幾啱。
﹙圖﹚恒生董事鄭海泉
E-mail：