劉華經常喺電視呼籲：「今時今日咁嘅服務態度係唔足夠。」唔知有冇作用？星期二陪功夫Ｌ去花園街「加記」買Hectic對NewBalance580特別版，標價二千四百幾。功夫Ｌ隻腳屬巨人Ｓ，問店長有冇十一或十二號？店長十分快反應，諗都唔使諗話冇問題，其實靜靜雞攞全店最大對十號半俾功夫Ｌ試。功夫Ｌ做零售出身，好識睇眉頭眼額，覺得店長神情有異，第一時間掀起鞋脷睇Size，踢爆店長可能博細個零碼唔多覺。
功夫Ｌ話：「本來諗住唔啱都買嚟轉手執番些少，點知佢咁急售反而趕客，做零售口甜舌滑唔緊要，但最忌唔老實。」功夫Ｌ講得有理，旺角班波鞋店長近幾年都染上此陋習，明知冇啱客人Size都夾硬用第二個碼頂上，唔聲唔聲博個客懵懵下唔多覺，咁搞法零售又點復甦呢？