年僅十一歲小朋友李晉緯（仔仔），將卡通電影《麥兜故事》主題曲《麥兜與雞》唱至街知巷聞，更為麥兜作幕後配音，成功背後卻遭到不平等待遇，幸好成人世界的利益瓜葛與是非，並未污染小朋友的心。
仔仔雖然唱紅了《麥兜與雞》，但他卻自言不算特別喜愛麥兜，不過他卻與電影中的麥兜一樣，很喜歡吃常餐及麥樂雞，仔仔故意用麥兜的聲音說：「我好鍾意食常餐，因為有即食麵同奄列，麥樂雞都鍾意食，食到停唔到口㖭呀。但媽媽話我要保護把聲，唔可以食太多煎炸同熱氣嘢同埋凍飲，所以次次都要偷偷地食。」
拍照當日，仔仔竟在不知不覺間將準備拍照的兩盒麥樂雞，偷食了一盒，到拍照完畢，另一盒也馬上被他吃清光。仔仔說：「我以前都有豬腩肉㗎，不過𠵱家細咗瘦咗啫嘛，我唔係減肥，好忙咪瘦咗囉。」
對於偶像任賢齊，仔仔謂：「我最鍾意唱《浪花一朵朵》，我媽媽都話我唱得好聽，有天分呀，成日都捉我同佢合唱卡拉OK㗎，不過我唔鍾意媽媽成日讀錯任賢齊個名做任齊賢，講啲歌名又講錯。」仔仔自言也愛搞笑及說笑話給同學聽，但在學校卻不敢搞笑，因為怕會被老師罰。
仔仔現年十一歲，邁向青春期，屆時若他變了聲，再不能為麥兜配音的話，他可有想過要做甚麼？他說：「我大個仔就要苦練樂器同乒乓波，我啲表哥表姐個個都識樂器㗎，有八級鋼琴，又識小提琴㗎，好犀利㗎。」
問仔仔有否因麥兜關係，在學校也受同學歡迎，覺不覺得自己好紅？他天真地說：「冇喎，乜嘢叫紅呀？我啲同學成日要我用麥兜把聲同佢哋講嘢囉，又叫我用把聲叫媽媽嚟聽吓喎，聖誕節都收到好多女同學送聖誕卡㗎。」
仔仔極喜愛周星馳，尤其愛看他的搞笑電影，每每都只懂對着電視機邊看邊笑，甚麼事也不管。
仔仔說：「我最鍾意睇《少林足球》，周星馳好放㗎，特技又好睇，我睇咗唔知幾多次。姐姐你可唔可以帶我見吓周星馳呀？」
原來仔仔天生有潔癖，他有時遇到拍戲場地地方不乾淨的，工作完畢堅持要馬上回家沖涼，記者要求他拿着隻肥雞拍照，他說好憎那種油膩感覺，不過仔仔也是個每事問的好學小朋友，不時追着記者問：「姐姐，係咪個個女仔都要搽粉㗎？姐姐，點解你笑得咁畸形㗎？」拍照期間，馬路剛好有一輛貨車經過，車上大聲播放着《麥兜與雞》，仔仔聽到，馬上面露一個精靈笑容，兩個深陷小酒渦十分可愛。
採訪：盧韻琴、蔡如玉
攝影：陳偉權
麥兜公仔提供：文具廊