幾位讀者來函問及「桂姐金句」，謹簡覆如下：（一）你哋要求得到桂姐嘅馬年預測嘅全文，我要問吓桂姐先至得，請耐性等候。（二）一位陳先生問阿桂姐肯唔肯同人客卜卦，佢想有事詢問桂姐；我真係唔知桂姐制唔制，又要問吓，佢嘅電話未得佢准許之前，唔可以喺本欄公開。
另外一位讀者問債券投資。答案比較簡單：（一）到銀行買債券要付費用，費用間間唔同，要去銀行問清楚，上次代按揭證券公司發售三年、五年債券嘅有八間銀行，左丁山只係記得恒生、滙豐、道亨呢三間，請自己去問吓價同埋債券嘅孳息率（市價）；（二）三年到期，一定可以取回本金（譬如債券票面值係十萬元，就可以攞番十萬元），債券價有升有跌，利息升就債券跌，利息跌就債券升，但揸到到期嘅話，價格升跌與你無干。據左丁山所知，三年期嘅債券最受香港投資者歡迎，而買家多數係退休人士，佢哋希望有一筆合理嘅穩定收入嚟應付生活所需，唔介意揸債券揸足三年。
一位學生Y問去台灣升大學好唔好，梗係好啦，如果你入到台大、清華、成功、政治大學等一級名校，更加恭喜你。《蘋果》老總葉一堅（快調去台灣做CEO）就係政大畢業生，而文筆好到一流頂嘅董社長橋先生，就係成功大學畢業生，學生Y去台灣讀大學，以此兩人為榜樣，堅持學習嘅話，掂硬！