香港時間5月31日晚上七時三十分，今屆世界盃就會由法國對塞內加爾揭開序幕。雖然距離各路列強爭霸尚有3個月時間，但唔少球隊新戰衣已陸續登場，誓要喺比賽前嚟個前哨戰。今屆新球衣大部分都放棄過往大量花紋嘅設計，改以簡單的V領或圓領為主，畀人一種復古的感覺。另外，除咗球員用嘅球衣、波褲同波砵外，連專為球迷而設嘅配件亦相繼到步，球迷不容錯過。
記者：張穎倫 攝影：林栢鈞
各洲球衣 獨欠北美
喺眾多新到球衣中，法國、喀麥隆、日本、阿根廷等球衣都已經曝光，即係話歐、非、亞同南美洲都已有代表入場，惟獨係代表北美嘅美國就姍姍來遲。不過美國隊嘅波衫一向都唔多人捧場，最緊要有上屆盟主法國就夠啦！
法國落場版 高科技掛帥
adidas今次都幾偏心，對三冠王法國零舍關照，喺佢哋嘅球衣上率先採用DLC動態分層式設計，將球衣分成貼身層及外層，呢啲新技術令排汗功能更卓越，球員穿着時又倍感舒適，其他球隊暫時都未有。外觀上，新波衫就由有領改為V領，亦將以往嘅橫紋取消，令球員穿上時感覺更加內斂。
售價：$600（adidas）
＊5月發售
德國新衫 望洗頹風
喺剛舉行嘅國際友誼賽入面，唔少球隊都換上世界盃新球衣亮相，惟獨德國仍以舊衫示人，但大家都記得00年歐洲盃中，德國就係着住呢件衫輸到七彩，咪話唔邪！所以德國推出新波衫，款式上最主要Cut咗舊款嘅白色衫領，而改用以往嘅黑色V領，而代表三冠王嘅黑、紅、黃三粒星則繼續保留。
售價：$450（adidas）
＊3月發售
阿根廷頻換球衣
阿根廷都算係換衫最多嘅球隊之一，啱啱先喺01年12月換咗新球衣，但未夠半年，嚟緊5月又會換上呢件新衫，唔知係咪戰略之一？新衫設計同其他adidas贊助嘅波衫差唔多，剔除咗袖口嘅白邊，V領用番藍色，睇落有種整齊嘅感覺。
售價：$450（adidas）
＊5月發售
藍腋圖案最靚巴拉圭
一提起巴拉圭，大家除咗留意門將芝拉華特之外，可能冇乜感覺，但佢哋呢件新嘅主場球衣確實令人眼前一亮。喺兩邊腋下加上藍色圖案，再加埋比舊款更鮮嘅紅色，令人眼前一亮，係眾多新衫中變得最靚嘅一款，值得推介。
售價：$399（PUMA）
＊3月尾發售
雄獅作客勝主場
同屬E組嘅喀麥隆將會喺6月11日碰上德國，無獨有偶，呢隊非洲雄獅嘅波衫亦係與德國嘅贊助商唔同，一場球隊、贊助商之爭亦在所難免。講番球衣，喀麥隆主場嘅新波衫沿用以往綠色嘅設計，反而冇呢件作客嘅白色咁自然，左胸雄獅徽章配上心口品牌豹型標誌夠晒威猛。
售價：$399（PUMA）
＊3月尾發售
日本不甘平淡
日本隊球衣自從轉咗adidas贊助就已經收晒啲「火」，減少大量花紋轉趨平淡，不過唔知係咪今屆貴為主辦國之一，佢哋嘅主場球衣竟然放棄咗舊款純藍色設計，喺衫身上加個網面，同其他隊以簡單為主嘅球衣大異其趣。另一方面，改用V領設計之餘，亦減去心口小國旗標誌，款式轉變都算幾大。
售價：$450（adidas）
＊5月尾發售
除咗國家隊球衣之外，亦有少量波褲同波砵曝光，其中PUMA最新嘅SHUDOH波砵更會由中國隊楊晨同全隊喀麥隆穿着，來頭絕對唔簡單。
楊晨食胡都靠佢
用呢對SHUDOH射波一定勁到爆燈，因為佢採用咗蹴道（Shudoh）技術嚟強化鞋框，有效防止大底喺強力射球下向後曲折，藉以保持射球動力同角度。所以中國國家隊前鋒楊晨、法國嘅皮利斯同安歷卡，以至全隊喀麥隆都係着佢出賽，敬請各守門員小心！
波褲襯波衫
波衫雖然有部分已經到咗香港，但波褲就只得少量，要襯番一套就有啲困難。其中更只有阿根廷比較好睇，由於波褲變化一向較少，好似呢條同舊款最大分別，都只係將以前褲腳白邊減去，唔算太大驚喜。
售價：$320（adidas）
＊5月發售
西班牙國家隊Cap帽
要留意唔少賽事都喺當地下午至黃昏時間舉行，可能有時西斜都幾曬吓，所以帶頂Cap帽都不失為一個唔錯嘅選擇。最緊要係西班牙嘅標誌極有漫畫味，平時帶出街都幾型，當然費高支持者實走唔甩。
售價：$100（adidas）
蹴球情熱手挽袋
唔知係咪今屆世界盃喺亞洲舉行關係，唔少精品都採用漢字圖案，其中「蹴球」更係到處可見。好似呢個手挽袋，有49×35cm夠大之餘，亦可當背囊孭，絕對方便，寫明蹴球情熱絕對係球迷之選。
售價：$120（adidas）
售賣點：
adidasShop（23286238）
鑽石山荷里活廣場2樓258-260室
PUMA專櫃（28343821）
銅鑼灣崇光百貨4樓