農曆新年之後，又係發展商大舉推售新樓盤嘅時候，大發展商財力雄厚，一舉一動都受到注視，見報率高兼篇幅大，其他發展商嘅樓盤明知唔夠爭，當然唔想同日搞活動，避避鋒頭，所以近期蘭西都收到一啲老友查詢，究竟邊啲日子有發展商開記者會，以便作出相應部署。𠵱家發展商賣樓，同行之間真係要鬥智鬥力。不過，大發展商都唔係贏實㗎，佢哋最擔心就係政府同日有哄動新聞公布。
近年經濟唔好，打工仔嘅工作壓力愈來愈大，公餘又要進修增值，私人時間所餘無幾，但太古地產企業傳訊部嘅同事，就響公司內部自發搞咗個義工小組，假日出動，佢哋話做咗義工後學到好多嘢。
美聯物業成立「豪宅天下」，專做豪宅買賣，最近攞到多個豪宅獨家代理，如淺水灣道37號3座6樓A室、香島道45號2樓B室、赤柱村道EdenView，同南灣道蕙苑等。咁多豪宅放售，係咪反映市道轉活？
舊年內地房地產熱潮，大量樓盤來港展銷，其中在港開售多年的番禺祈福新邨，一年賣出咗28.4萬方米樓面（約305.7萬方呎），套現12.9億元，攞埋廣州市全年賣樓榜冠軍。唔怪得祈福新邨舊年搬遷長期展銷廳，面積重大咗好多。
蘭西