美股走勢確反覆，杜指上個禮拜喺50日線（現處9912）上下穿梭，經上周五大升133點後，全周上升0.65%，收9968。
技術上，杜指守喺50日線上，就隨時可以轉勢向上衝，但目前美股受安然事件困擾，一旦出現新嘅經濟數據，未能反映美國經濟迅速復甦，美股又有急跌藉口，所以暫時都唔好睇得太樂觀，等杜指真正升破10200點先算。
港股上周跌2.7%，走勢明顯落後美股。近排表現較穩嘅地產股，亦因傳政府打算計劃再推售居屋而受壓。不過，相信政府會識做，小心呵護樓價，因此優質地產股唔需要睇得太淡。如果香港興業（480）回近2.20元，趙飛雲都打算撈番。
滙豐（005）嘅走勢係今個禮拜港股嘅關鍵，滙豐短期底部84.50如果失守，將進一步尋底，如果連82元都失守，則反映滙豐業績及前景都被睇淡。不過手揸滙豐淡輪嘅讀者若見滙豐升破87元，則宜準備隨時計數。
太平協和（438）似以三角形整固，如果升破0.70元，再挑戰0.74元高位，不過未出現大成交前，暫難有突破。