今屆渣打馬拉松有破紀錄嘅一萬三千人參賽，但有部分真係志在參與，因為沿途見到有參賽者邊跑邊講電話，有啲情侶重手拖手係西區海隧漫步，有啲更加係一家大細趁機喺西隧港島出口影相留念，真係乜都有。
賽會為咗鼓勵跑手爭取佳績，就設咗唔少破紀錄及達標巨額獎金等，不過，結果係全部送唔出。有跑手就話，香港天氣又濕又熱，跑道就上上落落，本已好難做到個人最佳時間，破到世界紀錄就更加冇可能，所以設破紀錄獎金完全唔實際。
香港街道向來都唔算乾淨，空氣又唔多好，噚日賽道之一的畢打街隧道，竟然發現有條死去多時，已發出惡臭嘅死魚，跑手途經時又唔可以閉氣，惟有強忍臭氣，有參賽者重向賽會投訴。