中煤Call輪9197出爐7日，頭6日成交加埋唔夠三球半，但上禮拜五就已經有5球幾，開始發熱。
輪價有冇得去，始終要睇正股（003）郁唔郁。中煤兩個禮拜前話玩埋西氣東輸，成個生晒，基金買貨掟錢唔手軟，亦唔會咁短癮。正股呢3個禮拜升8毫，望未來3個禮拜升多8毫，唔算大貪。8毫子對正股唔算得太大幅度，但9171得益就好勁。隻輪（8月到期）溢價得2%，槓桿率有近10倍，每份兌1股正股，溢價低，會好跟貼正股，輪價跟正股股價大概打個95折。正股升8毫，隻輪升7毫半，升幅差唔多有7成，變飛天輪。
賭Call輪，槓桿率夠大而溢價又好低嘅話，則輪價郁起上嚟好易令人富貴。當然，睇錯正股嘅話，則揸Call輪會輸到好閉翳。
美股上禮拜五彈升，港股會生生性性，熱門藍籌Call輪會生生猛猛。短炒或者朝種樹晚𠝹板，可以諗吓長實9063，和黃9110、滙豐9030、中移動9029、中信9160、恒指9045。