抵食大牌檔：
牛頭角最旺大牌檔招牌石榴蝦必食

這檔位於牛頭角14座的大牌檔，每晚六時開始燈火通明，準時恭候，七時半已食客滿堂，人山人海，街坊落嚟晚飯差點要訂位。食檔在年多前才易手，新班底的強項是不斷煮出新意的平價小菜，菜單隨季節轉換，今期的招牌石榴蝦更是必試美食，再加上這裏全無大牌檔粗聲粗氣的服務態度，怪不得入座率拍得住周杰倫演唱會。

記者：楊一凡　
攝影：林栢鈞

老闆推介：
餡料切成粗粒是為加強口感，切成茸感覺太霉，尤其是馬蹄粒，入口要索索聲先算正，個石榴蝦炸得夠乾身，才覺得香口，記得趁熱食，否則餡料的肉汁聚在包底，令春卷皮變軟。

黃金炸石榴蝦$48 招牌菜
石榴蝦像福袋，以為是用雲吞皮？才不，雲吞皮帶鹼水味，配蝦肉會帶苦澀味。店方用柔順軟熟的春卷皮，包着切成粗粒的冬菇、馬蹄和明蝦，咬開石榴包，餡料填滿嘴，賣相夠派頭兼分量十足的石榴蝦，兩三件已夠飽肚。

梅子蒸大鱔$50
鱔皮的油潤香口是魚中之冠，這有利亦有弊，食夠三件，肥膩令你停滯不前。廚者父母心，吃剩唔飽又浪費，不如用梅子醬助你開胃消滯，碟底加一層爽口的潮州鹹酸菜，在酸爽交錯，豐腴肥美合作之下，不經不覺又清了一碟。

Daisy試味： 成日都食豉汁蒸鱔，幾悶，梅子蒸或炒鱔，不常見幾新鮮，加咗冬菇和肉絲配料，好似鮮甜啲，梅子醬其實好酸味好濃，個鱔片切厚身些少都得。

潮州煮大蜆$40
蜆殼呈肉色，肉厚肥美，大廚用大地魚滾清湯煮蜆，後加肉鬆，令魚湯底更鮮，大廚自豪地說：「水煮蜆即係味精水，個湯底無肉無魚，邊會甜吖？我個湯有豬肉吊味，最後用魚露調味就搞掂，就算飲晒湯都唔口渴。鋪大量炒香的蒜茸，惹味好多！」

May試味： 蜆肉蒸得剛熟，肉質不會老，好清好鮮甜。個粉絲都好正，索晒湯汁，蘸辣椒油食，一絕。

美菜川椒雞球$48
以晚清的四川名菜宮保雞丁作參考，少放紅辣椒，因為細路老人最受不了，並把雞丁的Size變成雞球，配腰果、大葱和薑茸落鍋兜幾兜，再拋兩拋，睇準時機，雞球剛熟便上碟。

試味報告： 雞球入味之餘又不會太乾身，大廚說火候對這道菜式特別重要，過火位，炒乾身就乜雞味都無，美菜是炸得酥脆的珍珠菜。

腐皮海中寶$60
入選「海中寶」的是狀態至勇猛的海鮮，拍攝當日有膏蟹、生蝦、蟶子、帶子、鮮魷和元貝等，配菜有豆腐、芋頭和紹菜等，清湯底用魚及豬肉熬製，滾熟後鋪塊腐皮，配料若隱若現，掀起腐皮，在水中央是膏蟹，揭開蟹蓋，滿肚黃澄澄、油滑滑的蟹膏映入眼簾，朕滿足矣！

Kat試味： 我本身鍾意食海鮮，又食得清淡，湯面不會浮成層油，所以好欣賞這個夠分量的清湯海鮮鍋，湯底幾甜，食過幾次都唔覺口渴。

金針雲耳田雞煲$48
眼見田雞雙腿白白胖圓鼓鼓，個肚忽然好餓。田雞即叫即劏，取其鮮甜，適當調味後便可泡油，走油可保存水分。爆香薑片和芹菜後，再拌金針及雲耳同炒。

試味報告： 在眾多煲仔菜之中，以田雞煲至受街坊歡迎，因為田雞肉走過油後嫩滑不嚡口，但係味道較淡，遇上同樣淡口的金針雲耳，自行蘸醬油添色調味。

店名：新南苑海鮮飯店
地址：牛頭角下邨14座24至26號地下（近九龍灣地鐵站B出口）
電話：23318717
座位：約100個
營業時間：晚上6時至凌晨3時
付款方法：只收現金