無綫電視翡翠台可以講得係香港最有影響力嘅傳媒單位，差唔多佢話你會紅，你就一定會紅。唔單止人會紅，物都會紅。電視劇《義不容情》播出嘅時候，無數人跟住摺幸運星，喺嗰一排，如果屋企冇一樽幸運星的話，等於話畀人聽冇拖拍。
後來嘅《壹號皇庭》又唱紅咗幾首英文歌，嗰一排去卡拉ＯＫ，經常會聽到人唱，唔理發音是否準確，又或者乾脆當係廣東歌咁嚟發音，總之唱到既投入又有深度。
最近大熱放送嘅卡通片《極速搖搖》令到搖搖熱潮重臨香江，小朋友們人手一隻，玩個不亦樂乎。
搖搖呢樣玩意都算係長青之物，記得讀小學時都曾經為佢沉迷過，當時係由可樂與雪碧帶動，名叫「羅素搖搖」，售價分三種：個幾、三個幾同五個幾，五個幾那款是頂級貨色，極之好fing。《歡樂今宵》當時專程請來外國的搖搖大王來表演，花式包括甚麼「小狗散步」、「巴黎鐵搭」、「左右大迴環」，書報攤上也有《搖搖秘笈》賣，大家跟着練個不亦樂乎。
偶爾問小朋友借個搖搖嚟玩，玩得幾下，兒時曾學習的技法慢慢上手，只見小朋友雙眼放光，不相信大人點解也會懂得玩搖搖。
忽然記起，吳孟達阿達哥也是一位搖搖高手，不信的話，請重看《破壞之王》，他在當時以搖搖當係血滴子，玩得非常似模似樣。