嬌小黑珍珠湯圓

今日必買：湯圓有大團圓、圓滿之意，元宵佳節當然唔少得。一般湯圓都係糯米皮，白雪雪一粒，但呢款以黑米及糯米做成嘅湯圓則係紫色皮，烚熟咗零舍靚，最啱喜慶時食用。而且佢比一般湯圓嬌小，食多咗都唔易膩，佢皮薄煙韌，內裏嘅芝麻餡又多，絕對係愛好湯圓者另一新選擇。

記者：陳冰麗

糯米粉加生粉搓湯圓
入廚心得： 自製湯圓可以任意配搭自己鍾意嘅餡料，不過要湯圓皮做得又薄又唔黐牙，搓皮時就需要注意以下重點。
湯圓皮係用糯米粉加水搓成，但因為糯米粉係用機器所磨成，會失去黏性，煮湯圓時就容易腍爛及黐牙，所以喺搓皮時最好加入一啲生粉，因為佢黏性較強而又帶韌，比例為四両糯米粉，就要三湯匙生粉，再加適量水搓成粉糰，用濕布蓋住放約半小時即可以包湯圓。

記者、攝影：陳冰麗