以前叫做德智嘅駿雷國際（070），近排無論成交量同埋股價都升咗好多，但上個禮拜五急挫7.8%，收11.7仙。
小初有個唔識中文嘅朋友ABC打電話畀小初，佢話佢個經紀話隻股呢個星期會有搞作，但唔知同抽水活動有無關係，佢問小初好唔好食過翻尋味，再炒多一次。
駿雷自從靚仔歌星老竇入主後，配過4次股咁多，但計計埋埋集資額都好似只得5000零萬元咁上下。駿雷最近一次配售3.05億股新股，每股作價8仙，呢個位守得好穩陣，上星期五重一度升返上13仙樓上，可惜高位有回吐，破壞咗升勢。
先前亦有人對小初講，話隻股要升回上次14.9仙高位，其實並非難事。小初曾睇過經紀買盤嘅牌路，同上次炒上係同一陣容，唔排除對上一次配股股份，可能又係佢哋接晒。
不過隻股抽高之後出現回吐，加上成交增加，似係散貨。小初勸ABC唔好亂追。