XBOX去年喺美國因為食正聖誕檔期推出，所以銷情十分理想。至於日版XBOX方面，終於喺上星期五（2月22日）正式登陸遊戲王國日本，香港水貨商亦反應甚迅速，在同日晚上已有少量抵港，新機首日開賣價，曾被推高至3千幾水平，不過幸好翌日已有大批貨返，賣價亦回落到2千幾合理水平，有心買機嘅玩家，入貨係時候喇！
記者、攝影：徐影龍 ImageGirl：Natiale
日版XBOX喺上星期五中午已經有貨返，而透明限定版則在同日下午有少量貨源抵港，據旺角、深水埗同灣仔各Game舖資料回報，首批限定版即晚沽清（每間約五十部），而且因為試機需時，搞到唔少店舖出現長長人龍，當中佔大部分係一早已畀錢訂機之人。翌日星期六，情況改變不少，雖然仍有不少人出機，不過已經唔覺有人龍出現。
日版XBOX卒之喺上星期五晚到港，當晚港九各Game舖的確引嚟唔少人圍觀同買機，當日普通版約賣$2,800，而限定版則索價$3,400到$3,600不等。
不過幸好到星期六已有大批貨到港，日版XBOX機價亦隨即跌價，限定版只需約$2,780，而普通版更跌至約$2,280，貼近PS2售價，一日時間跌幅都算頗大。
唔知係咪BillGates入鄉隨俗，推出日版XBOX時，居然大玩日本好興嘅特別限定版。呢套特別版全球限量五萬套，同普通版主要有三大分別，有心買限定版玩家真係要衡量一下，是否值得花多六百蚊買特別版喇！
暫時嚟講，美版同日版遊戲係唔可以互換，所以跟隨日版XBOX到港嘅遊戲相當受注視。呢兩日大概有十款日版Game到港，較具人氣嘅包括《DOA3》、《DOUBLE-S.T.E.A.I》、《JSRF》同《AIRFORCEDELTAII》等，其他重有各式賽車同動作類型嘅Game，令新機到港氣氛頗熱鬧。至於《幻魔鬼武者》同《SILENTHILL2》同PS2版本差唔多，所以Game舖較少入貨，變成貨源甚缺。
美版XBOX在港發售時已成出機必跟遊戲，到日版照舊冧庄成No.1，遊戲內容同美版差不多，冇新角色冇新舞台，只不過每人都多兩套新衫，幸好遊戲畫面出色，系統完善，未玩過嘅的確值得買番隻。
呢隻Game未出先哄動，因為舞台以香港街景為主，玩家操控各式古怪戰車，喺鬧市內橫衝直撞亂咁破壞，背景全都熟口熟面，香港人玩落倍添親切，難怪成為銷量亞軍。
世嘉DreamCast名作《JetSetRadio》續篇，當年憑住古怪創新玩法而令機迷留下印象，嚟到機能更強嘅XBOX，保留過癮玩法外，畫面多邊形數量及流暢度亦大幅加強，輕易佔銷量榜季軍。
日版XBOX同之前美版機一樣，需要外加一個強力變壓火牛。由於呢個300W強力變壓火牛賣價唔平（約$250），是PS2用嘅$70火牛足足三倍有多，所以好多Game舖賣XBOX都唔會包埋。可惜有啲無良店舖為求搶客，居然跟機送埋火牛，筆者好奇下求證該店舖，原來送嘅只係PS2用火牛，等客人畀晒錢，先至講話換強力火牛要加錢。呢招不但無良至極，若果客人冇電器常識照用，分分鐘有可能引起火災（早兩年香港曾發生類似火災事件），所以大家買機時要小心問清楚，千祈唔好為慳錢夾硬用普通火牛！
DreamStore（灣仔東方188）
電話：25753285
E-GameClub（深水埗黃金商場）
電話：27287469