轉眼間農曆新年假期又過去，為咗令孤寂嘅獨居長者可以感受到節日嘅熱鬧氣氛，得到社會人士嘅關懷，蘋果日報慈善基金特別喺今個新年，分別撥款畀多間社會服務機構舉辦新春活動，包括向三百幾位貧困獨居長者派發賀年福袋，令個個公公婆婆笑到四萬咁口，部分長者見到袋裏面有保暖壺、白米同埋頸巾等日常生活用品，都齊聲話好啱用。
有部分義工更趕及喺歲晚前夕，親手炮製愛心蘿蔔糕送贈長者。另外，唔少得有善長贊助團年飯活動，免費招待四百位獨居綜援長者濟濟一堂食餐豐富嘅團年晚飯，佢哋除咗有得食、有禮物收，重欣賞到由義工表演舞獅助興，席間各人不禁拍爛手掌。
當晚七十二歲嘅獨居老人蔡婆婆同大使講，今年佢可以同咁多人一齊食團年飯，唔使孤伶伶屈喺屋企咁悶，所以真係好開心。
蘋果慈善基金創辦多年，致力服務弱勢社群，所以希望各讀者慷慨解囊，令更多貧困人士受惠。
暖流熱線
電話：29908688
傳真：23702192
電郵：
網址：