新年一過食得多過年食品，搞到個胃有啲滯滯哋，最好食番啲消滯食品清清腸胃，好似有消滯功效嘅綠茶麵、有助消化的士多啤梨、黑加侖子、柑桔等。綠茶麵可以就咁食夠方便，而士多啤梨、野楊梅、柑桔等，只要配上不同材料就可炮製出又靚又好味，兼有消滯功效的小食，製法簡單容易，不妨試一試。
記者：葉少萍 攝影：黃子偉 ImageGril：Natalie
柑桔有幫助消化的功效，但就咁食又好似太單調。想食得特別啲，可用專製日式果凍的啫喱片，製成日式柑桔果凍，不但外觀靚一靚，入口表面層啫喱煙煙韌韌，粒柑桔又酸又甜，美味之餘又有助消化。除咗可配柑桔外，配同樣有助消化的士多啤梨、黑加侖子亦可。
日式果凍啫喱片10片
日本糖浸柑桔2粒
好多生果都有幫助消化的功效，例如士多啤梨、野楊梅。不過就咁一粒粒食，又好似太單調。想食得特別其實都好簡單，只要將士多啤梨、野楊梅放入果撻內，再喺表面淋上紅糖漿，咁就變成美味生果撻，士多啤梨、野楊梅食落又酸又甜，果撻夠晒鬆脆，又好味又有助消化，不妨試試。
士多啤梨1粒
野楊梅6粒
日本糖浸柑桔1粒
果撻1個
紅糖漿1包
綠茶本身有消滯功效，將之用來製成麵條，最適合食滯咗但又覺肚餓的人士食。呢款綠茶麵用日本京都出名的綠茶製成，入口有陣陣綠茶香味，咬落啲麵夠晒煙韌，再配埋呢支日本食冷麵專用醬汁同食，清啖得來又有一陣豉油香味。不過呢支醬油開封口只可儲存約3日，如果唔係會變壞兼變味。
綠茶麵100克(2札)
冷麵醬汁200毫升
蔬菜有幫助消化的功效，將之製成沙律，不但好味，重可以保持新鮮度。用得多沙律醬製沙律，不如用呢支可以製沙律的柑桔醋，配有機蔬菜製鮮味又酸酸甜甜的沙律食就最好。而且柑桔同醋都有幫助消化功效，食油膩食品食到滯咗，食番啲酸酸哋的沙律，有助消化兼清腸胃。
有機蔬菜1包
柑桔醋100毫升
洗淨蔬菜隔去水分，加入柑桔醋拌食。