唔知各位重記唔記得我哋嘅曾司長年幾前喺公仔箱裏面大聲同人講，話香港一定會「超英趕美」，點知香港經濟喺呢年幾不但未好轉過，而且重每下愈況，失業率真係「超英趕美」，愈升愈有。
喺幾年前，邊個都唔會諗到香港嘅失業率竟然會排喺全亞洲第一，呢個噩夢終於喺上個禮拜發生，政府公布嘅1月份失業率已經去到6.7%水平，而且喺外圍經濟仍然暗淡下，好可能重會有好多酒樓食肆關門大吉，三月份嘅失業率分分鐘會去到7%。
唔單止咁，市場重傳聞香港其中一個最大嘅米飯班主滙豐控股（005），因為南美業務要大幅撇帳，喺三月頭公布完業績後話會裁多三千幾人，睇嚟香港人要有運行真係要靠上天保佑。
呢排外圍股市仍然大雪紛飛，美股俾單Enron案搞到成隻軟腳蟹咁，港股重係無得發圍，睇住個市一日差過一日，成交額仍然得嗰50零億，好多投資者都視藍籌股為雞肋，紛紛將啲錢搬去買細價股，希望好彩可以博到一鋪。
喺資金繼續流入細價股下，上個禮拜有好多隻細價股無端端升咗幾成，有部分更創出全年新高㖭，其中一隻金犀寶（1192）就喺一個禮拜內升近4成，上周五成交更升到七千幾萬股。
聽市場炒家講，金犀寶已經俾一條大陸水睇中咗，話會借佢隻殼上市，而且重話條大陸線係叠水之人，隻股喺𠵱家個價隨時重可能會翻多一番㖭。不過由於呢隻股仔今年已經累積升咗5成有多，要賺錢嘅話就真係要睇各位轉身夠唔夠快。