今年三十一歲的莫文蔚，九三年加入娛樂圈發展，她待人處世的態度一直深受父母影響。
Karen表示自幼家教便很嚴，不過父母對她在娛樂圈所做的事，一向甚少過問，但遇到開心或不愉快的事情，母親便是她的傾訴對象之一。
莫：媽咪同我嘅關係有時會好似朋友咁，有乜心事我都會同佢分享，我覺得媽咪好幸福，因為世間上最好嘅男人都已經娶咗佢做老婆，我爸爸簡直係四十八孝嘅好男人，無論對老婆或仔女都係咁好。將來我都唔知自己有冇媽咪咁幸運，可以搵到個咁好嘅對象，所以到𠵱家我都未諗過結婚，始終覺得結婚對我嚟講，好似係好遙遠嘅事。
莫：記得我讀中學嗰陣，我要參加一個校外舉行嘅古箏比賽，個古箏又重又大，阿爸驚我攞得辛苦，重專登一早起身，幫我揹住個古箏陪我去比賽，見到阿爸揹住古箏行斜路嘅背影，當時我真係好感動。
𠵱家我入咗娛樂圈，佢差唔多每日都會燉燕窩畀我食，等我捱夜都可以有番啲滋潤，所以我覺得呢個阿爸真係體貼入微。
由莫文蔚演出周星馳的電影《西遊記》開始，同時也是星爺與朱茵感情終結之時。而Karen與星爺再合演完《食神》後，他倆的一段情亦告終結。不過，Karen在《食神》的出色造型及演技，卻將她的事業推向高峯，所以她與星爺在一起，有失，亦有得着，難怪在Karen口中，星爺永遠會是她的好朋友。
撰文：陳月媚
協力：羅慧敏
攝影：陳志嵐
服裝提供：SalvatoreFerragamo
鳴謝：ClubHAVANA