年假過後，又係車壇活躍期嘅開始，究竟嚟緊日本會有甚麼較突出嘅新車推出呢？當中我哋揀選咗三款剛面世及快將推出嘅新型號，而且佢哋重係好有機會抵港嘅車款嚟㖭！事不宜遲，不如𠵱家就一齊嚟睇吓佢哋有幾吸引啦！
記者：EricCheung
日本嘅K-Car潮流，近期香港市場亦漸見普及，而呢部本田That's，會係自去年東京車展，首度亮相而瞬即量產嘅新車款；賣相講究時下至In嘅文化潮流之餘，車身重可以響不同色調嘅套件配搭下，營造出TwoTone入時色彩㗎！既慳油又實用嘅個性，唔知香港車迷會否接受呢？
自去年7月至年底12月嘅一段時間內，豐田Echo嘅本土銷量，僅錄得68,290部，遠比同級本田Jazz嘅100,744部，相距有成32,454部之多，又難怪豐田廠方會急謀對策。由於Echo面世多年，故廠方最近決定，響嚟緊5月推出曾於東京車展亮相過嘅i.s.t.概念車作量產型；雖然豐田方面未有透露呢個新車系會否入替Echo，惟日本汽車傳媒卻對之極為重視。再者，呢部i.s.t.尺碼較Jazz及Echo為大之餘，兩台分別為1.3公升及1.5公升嘅引擎配搭，表現亦要來得出眾，加上新車包裝有點酷似MiniCooper，以日本人對「谷巴仔」嘅狂熱，睇嚟i.s.t.早已得先機呢！
期待已久嘅新一代Forester，早前廠方經已有正式公布，相信會率先響北美推出嘅新車，或許會在今年年中輸入香港都唔定。新車較上一代更具SUV車神采及剛勁感外，全天候恒式四驅操控，會係廠方不二嘅選擇外，更會沿用兩台2.0公升自然吸氣及Turbo偈組合，惟性能輸出給調低，以營造有較佳嘅耗油量㗎！