莫文蔚在舞台上和電影中的形象，一向予人豪放、性感的感覺，但現實中的她，對愛情卻絕不開放。自出娘胎至今，莫文蔚認真結交過的男友只有三、四個，再見亦是朋友的周星馳已成過去式，至於近日與她傳緋聞傳得鬧哄哄的馮德倫，則是莫文蔚目前的真命天子。
莫文蔚（Karen）出道以來，緋聞不算少，當中以她與周星馳維持了三年的一段情最為人熟識，但最終因星爺身邊出現了于文鳳，兩人於前年分手。但窈窕「型女」，君子好逑，近日Karen與馮德倫的緋聞亦炒得相當熱。
莫文蔚：莫 記者：記
莫：由細至大，我都只係有過三、四個男朋友，我唔係你哋想像中咁開放嘅，對感情事我好執着同專一。我唔容易投入一段感情，但當我投入時就會一心一意，唔會再對其他追求者有任何反應。
記：星爺用情咁不專，你同佢拍拖嗰陣，你咪好唔開心？
莫（尷尬一笑）：呢啲事都過咗咁耐，我唔想再講，𠵱家我可以講，星爺係我好珍惜嘅朋友，佢好有才華，至於佢其他嘅嘢，我已經冇所謂，佢永遠都會係我好朋友。
記：同圈中人拍拖會唔會覺得壓力好大？
莫：我又唔覺得喎！其實我選擇對象只係睇緣分，只要同呢個人喺埋一齊開心就得，我唔會好似一啲人咁，要列出一張擇偶清單去搵對象，我從來唔介意同圈中人拍拖。
記：咁最近你係咪同馮德倫蜜運中？
莫（笑得異常燦爛）：感情事我真係唔想講咁多，你哋咁聰明，有啲嘢我唔講，你哋都應該估到，我覺得馮德倫係一個好積極、不斷求進步嘅演員，同我都幾啱傾。
記：你對感情專一，如果你嘅對象唔專一，你能唔能夠承受打擊？
莫：傷心就實會有，但不至於要生要死。其實有時我處理一啲事會幾衝動，但我將啲唔開心嘅事發洩晒出嚟之後，再瞓一覺就乜事都冇，唔會將啲唔開心嘅事一直擺喺個心度。拍拖梗係有開心同唔開心時候，但我相信女仔。