農曆年假一完結，大批日本玩具大軍殺到，論人強馬壯最多產品嘅，必屬MEDICOM嘅KUBRICK積木公仔：包括迪士尼Part2、《猿人爭霸戰》電影版兩套KUBRICK公仔。呢個星期二就係中國情人節元宵佳節，不妨藉此機會買套KUBRICK嚟𠱁吓對方，相信現時唔少潮流男女都愛儲呢類積木公仔呢！
記者：梁煒健 攝影：林栢鈞
上次MEDICOM生產嘅迪士尼Part1KUBRICK，由於有米奇老鼠及美妮擔正，瞬即soldout，冇得留低，想再翻單更加冇可能。家陣Part2登場，每款約3吋高，而主角就變為黑白版嘅唐老鴨及高飛狗，而且混合其他卡通片人物，例如《怪誕城之夜》嘅白骨鹿、《木偶奇遇記》嘅蟋蟀仔，另外《反斗奇兵》嘅Andy及白雪公主等亦做得十分神似。現時每款售價$30，但要自己開盒先知係邊一款公仔，唔想碰運氣嘅，不如買齊全套7款$299。若果要埋特別版第8款嘅聖誕裝束米奇老鼠，就要畀Fullset8款售價$699嘞！
電影版《猿人爭霸戰》MEDICOM首次生產Kubrick公仔，自然令猿人Fans瘋狂搶構。PartA呢套Kubrick除咗有奸角Thade、猿人女Ari及長者Limbo外，又附送軍營帳幕，巨型又正斗，確係相當大陣仗。
《猿人爭霸戰》電影版嘅Kubrick，一次過推出兩套。PartA就以大帳幕作招徠，而PartB則以人多勢眾、來勢洶洶嘅猿人將軍作賣點。呢套Kubrick有多位猿人統領，分別有普通步兵ChimpWarrior，猿人指揮官ApeCommander，以及一身黑色盔甲嘅將軍Attar。另附送一匹戰馬，擺埋將軍Affar一齊就更加型仔吸引。