香港家長非常關心仔女嘅教育，尤其重視點樣送仔女入名校。本欄在二月初寫咗一篇《有好學生則靈》，講世姪女在馬鞍山一間世界級名校讀書，即刻收到半打電郵、來信，所有讀者（多數係阿媽）都問：「間學校叫乜名？可唔可以選為升中首選？喺邊度？」
本來唔想畫公仔畫到出腸，不過既然咁多讀者有興趣，惟有照答，啲阿媽或者感到好失望都唔定。呢間世界級名校叫做「世界聯合李寶椿書院」，校址在帝琴灣豪宅隔籬，係一間預科學院，只收中六、中七生，學生來自世界各地，啲升中生唔使諗嘞。以左丁山所知，本地學生嘅中學會考成績少過五科A，冇兩三門標青課外活動（如體育、音樂）兼有社會服務紀錄嘅學生，可以慳番時間，唔使申請。
左丁山識得嘅世姪、世姪女，咁多年有五位入咗去讀，好似係兩位入咗耶魯、兩位去咗西北大學、一位仍在校內。去西北嗰位女生，會考六優，來自尖沙嘴著名女校，據佢講佢在入面讀得好勤力，但有啲來自外國嘅同學，好似日日都去搞課外活動，但考試成績就好過佢喎。正因為入邊有咁多精英學生，老師一啲都唔辛苦！
老實講，入得呢間李寶椿書院嘅會考生，點都係極少數，各位阿媽千祈唔好抱有甚麼期望，反而學費就唔使驚，佢肯收你啲子女囉喎，獎助學金唔係問題！