成日睇港產片同荷李活式西片，會唔會有啲悶呢？今個星期新到DVD有好介紹，伊朗大導演馬哲馬芝迪近期力作《後父》，啱啱出咗3區DVD，套戲都係食番「小孩子走天涯」嘅舊橋，並講述小孩子在面對窮困及貧乏物質生活的艱辛環境下，仍能培養出高尚的人格，睇完包你做人都積極好多！
文、攝：馮彥彰
世界聞名嘅伊朗大導演馬哲馬芝迪，一向以拍細路仔戲刻劃細膩而聞名，佢嘅成名大作《小鞋子》同《小孩子走天涯》，相信好多人都睇過，而今次介紹嘅呢套《後父》，跟佢嘅前作《小鞋子》十分相近，形式上都係以小孩為中心，將小孩子面對貧窮下的一點一滴表露出來；例如劇中講到主角為了生活，細細個就要做童工，而且在成長的過程中，亦完全享受唔到健全社會下所帶來嘅物質生活，不過小孩子仍能堅毅不屈地面對這樣的大逆境，從而反映出他的高尚人格。
看畢全戲，感覺上《後父》嘅感染力，要遠較《小鞋子》還要大！而且在馬哲馬芝迪鏡頭下嘅小孩子，好易令人聯想到現時香港的負資產一族，睇完《後父》嘅小孩子咁積極面對人生，相信會為大家嘅人生帶來一點啟發。
《後父》（Father）
DVD區碼：3區
售價：$70
《人工智能》
《人工智能》呢隻DVD就真係好多嘢睇，當你一打開個盒，你就會發現佢有兩隻DVD碟，你除咗可以睇到足版嘅《人工智能》之外，佢重加插咗大量製作花絮同訪問，這是以往史提芬史匹堡電影所出的DVD中，比較少見的情況，所以感覺上真係好抵買。
記性好嘅讀者，都應該知到呢套戲嘅劇本，其實係來自大導演寇比力克同BrianAldiss嘅短篇故事《Super-ToysLastAllSummerLong》，後來寇比力克因病逝世，所以改由史提芬史匹堡執導將它拍成電影，所以戲內隱隱約約滲入了寇比力克的風格。
另外，值得一提係此碟嘅音效超正，而且畫質亦有所交代。《人工智能》除咗有杜比5.1的音響效果之外，佢重特別加埋杜比2.0環迴立體聲，相信一般3區碟都未必有咁嘅功能，用嚟試機一流，必買！
《人工智能》（AI）
區碼：1區(dts)
售價：$180
《全職劍客》
《全職劍客》啱啱先喺戲院落畫冇幾耐，估唔到咁快又出DVD。雖然套戲唔算係一線大戲，亦冇乜嘢大卡士助陣，但當你睇落，又會覺得佢幾得意。故事是法國名著《三劍俠》嘅新篇，同原著最唔同之處，就係故事表達手法比較寫實，並且打破了三劍俠英雄無敵形象，所以感覺上更加有血有肉。
值得一提係此戲的武術指導，原來係昔日《黃飛鴻》系列嘅武術指導洪欣欣（前中國武術教練），所以武打場面要遠較一般西片來得燦爛。另外女主角方面，今次亦搵來了法國女星嘉芙蓮丹露同埋《美麗有罪》美女美娜蘇華慧（MenaSuvari）同台演出，法國靚女加中西混合武打場面，唔知大家睇完畀幾多分呢？
《全職劍客》（TheMusketeer）
區碼：1區(dts)
售價：$180
售賣點：DVSHOP
電話：21949100
地址：九龍深水埗福榮街107號舖