蒙嘉慧（YoYo）前晚同一班男人，喺跑馬地食飯，之後YoYo嘅友人重去咗附近嘅生果店買生果。
YoYo前晚同一大班男女友人同行，其中大部分係男人，佢哋坐住由一個年輕男子揸嘅車，去咗跑馬地食飯，YoYo見到記者影相時表現大方，重落車畀記者影相，但佢啲朋友可能都唔係圈中人，所以對於鏡頭都非常敏感，馬上迴避，有啲重擰轉身用手遮面。
問YoYo車內有冇佢男朋友，佢話：「我有好多男性朋友㗎，我今晚（即前晚）同班朋友食飯，因為之前去咗內地拍戲，而過兩日又要開戲，所以咪約啲朋友一齊食飯見面囉！」
鄭伊健同梁詠琪啱啱喺瑞士返嚟，馮仁昭有個富貴朋友，喺米蘭名店Gucci撞到佢哋，轉頭另一對情侶關之琳同黃家諾都喺嗰度出現。呢兩對情侶，兩個女人都瘋狂掃貨，但唔同嘅就係埋單時，一個就男友畀，一個就女友畀。喺呢度真係要讚吓伊健，伊健當日入到Gucci就乖乖企喺度等女友揀衫，等完之後又好乖咁去埋單。至於之之同男友黃家諾一齊揀完之後，畀錢嗰位當然係之之啦，因為埋單條數係幾十萬呀！
古巨基自約滿EEI後，一直未有簽約唱片公司，據悉基仔原來簽咗畀台灣一間好大嘅製作公司，嗰間公司會搞埋宣傳同發行唱片。而台灣以外地區，基仔就以過千萬轉會費簽畀Sony做發行，基仔嘅經理人敖君怡話一切嘅事，大概三月先向外公布。
謝偉俊（Paul）前晚同兩位男士去蘭桂坊消遣，佢見到記者即刻話：「佢兩個係我喺廣州嚟嘅朋友，佢哋嚟咗香港，我咪帶佢哋四圍玩吓囉！」問阿Paul點解唔見佢帶埋白姐姐，佢話：「白姐姐有啲唔舒服，所以頭先食完飯，佢就走先。」
吳君如日前喺佢主持嘅電台節目《嘩！嘩！嘩！打到嚟！》度，講番佢之前同劉德華出席柏林影展，喺飛機上面同華仔一齊過夜。
君如話佢嗰朝喺飛機度好早起咗身，見到華仔瞓覺嗰陣鍾意大被蓋過頭，包到好似個木乃伊咁，佢重話華仔瞓覺嗰陣，冇發出過鼻鼾聲喎。
苑瓊丹（苑仔）上年本來計劃開一間用玻璃起嘅紅酒舖，但呢個計劃已經隨住經濟唔好而擱置。但苑仔眼見時下嘅人對一啲平靚正嘅享受，樂於花費，於是就同幾個幕後嘅朋友合資，準備年中喺尖沙嘴開一間按摩店。苑仔同馮仁昭講，佢間按摩店好注重師資，所有嘅按摩師傅都會廣州醫院做培訓。