單睇今個禮拜港股走勢，實在相當肉酸，恒指高開低收，以10664收市，一周共跌297點，跌幅2.7%。不過上周港股只有個半交易日，大戶乘農曆年假前後挾淡，恒指飆升443點，加上冇乜成交支持，今個禮拜出現獲利回吐，其實好正路，唔代表港股表現特別差，守得住10400，仍只不過係上落市。
杜指走勢其實同恒指差唔多，喺9600至1萬關前反覆上落，只不過走勢似波子機，較為波動，守得住9600，都係上落市。
趙飛雲今個禮拜睇啱市，以沽貨獲利為主，只喺支持位撈番啲太平協和（438）。美中不足係沽咗嘅中航興業（1110）及香港興業（480）繼續升，可能累讀者沽早咗。不過睇見大市轉弱，而手上股票有利潤，沽貨先套利，策略並冇錯，只怪趙飛雲揀嘅股票太硬淨，又或者同佢哋唔係太有緣，希望回頭可再續前緣。
至於今個禮拜嘅主題，心水清嘅讀者一早就知道係滙豐（005）Put輪。期指下周三結算，滙豐向下突破機會較大，但正如筆者所言，港股暫時只係上落市，見滙豐守得住84元，滙豐Put輪應先獲利。