新年假期好快過晒，立法會噚日請咗董特首、行政會議成員同主要官員食午飯，嚟個新春團拜搞好關係，重有個書法比賽搞氣氛，由議員職員比賽寫對聯，再由老董同官員投票決定結果。
八方噚日去到立法會宴會廳，見到十二對對聯掛起，由邊個寫就係秘密，全部對聯都好有意思，其中一對用了二十五個議員嘅名砌成，「國泰家富華霆耀，怡嫻樂業壽長青」，不過官員似乎唔多鍾意，三甲不入。
結果公布嘞！身在印度的民建聯主席曾鈺成，憑工整的字體寫出「開元除舊晦，入世創新機」，四票攞到季軍，亞軍多佢一票，簡單的八個字「如意吉祥，龍馬精神」，筆筆剛勁有力，究竟係邊個寫呢？
田北俊！吓？田少識的中文字已經少，重要寫毛筆字？係咪請槍呀？佢一攞獎即刻叫：「好弊！好弊！」弊就弊在呢個亞軍迫佢揭露一個秘密，話說佢有次返國內，俾人笑連簽個中文名都咁核突，於是返香港搵朋友介紹個錢老師教佢學毛筆字，一堂兩個鐘要成千蚊，學寫田北俊三隻字就用咗五、六千蚊。到今次書法比賽，佢唔抵得自由黨冇人參加，結果自己再畀多三、四千蚊，只係學寫八隻字咁多！
冠軍張文光寫嘅對聯，睇內容都諗到係民主派出品：「民生有賴開新運，法治無遺護庶民」，佢攞夠十一票得獎，話要多謝華叔讓路唔參加喎！
除咗議員開心之外，記者噚日都有份玩，就係估吓邊對對聯得冠軍，估唔到《蘋果》唔只馬經貼中3T，就連估對聯都中高官嘅心意。
E-mail：