旺角金聲戲院，行落一條街，靠左有個小型露天街市，佢就係位於旺角花園街及煙廠街交界嘅煙廠街街市。呢個街市前身係喺花園街街邊一帶擺檔，直至十年前至正式搬入煙廠街以有規模式經營，至今已有五十年歷史。街市中間主要賣蔬果，左右兩旁則賣肉、海鮮及乾貨，雖然呢個街市唔大，但勝在唔侷促，行得舒服，而且裏面賣嘅餸菜價錢大眾化，絕對係精明主婦嘅心水選擇。
記者：陳冰麗 攝影：陳盛臣
喺街市靠右邊直入去到盡就係呢個檔口，賣冰鮮魚居多，價錢則頗為經濟，大眼雞、馬頭均以斷份出售，每份都只係十蚊，以狗肚魚更加係大平賣，每斤十蚊都唔使。想食得矜貴啲，亦有星斑、泥斑供選擇，質嫩滑；平價啲亦可以揀選細條斑仔梭羅斑，比星斑平一半，每両只係$1.5。
(連記鮮魚20A舖)
大條嘅狗肚魚市價至少要$10-$12斤，呢度只係$8斤，相當抵食，滾湯或煎食都咁適合。
大眼雞係抵食之選，每份$10，有五條，市價有斷両出售或每份十蚊，但只有四條，始終都唔及呢度咁平。
呢度有大大條嘅星斑賣，但如果食厭咗或者覺得唔多抵食，介紹大家試吓呢啲細斑仔，梭羅斑(左)、紅口斑(右)及泥斑(下)，前兩者重係較少有嘅斑仔，每両分別$1.5、$1.8，肉質嫩滑，魚味鮮。下面較大條嘅泥斑，每両$2.5-$3。
烏頭可以兩食，熱食或凍食均可以，潮州人最鍾意凍食，以普寧豆醬蘸食。呢度啲烏頭亦係平靚正，每両只係$0.8，一條只係十零蚊。
呢個菜檔賣嘅蔬菜種類唔多，但勝在夠平，喺呢個街市內最平係呢檔，其中包括有菜心、薯仔、椰菜、番茄、白蘿蔔等等。由於賣得平，好多街坊都係檔主鍾伯嘅長期客仔，拍攝當日只見鍾伯口停手不停，難怪天氣仍涼，佢都只係T恤一件，原來忙到周身滾。
(鍾伯菜檔4號舖)
鍾伯菜心全部由大陸嚟，每斤比其他檔口平$1，只售$4，而且乾身無濕水，絕對足秤。
椰菜係呢度最抵食嘅蔬菜，每斤$2.5，係乾身貨，白中帶淺綠，質素佳，食落爽甜。
呢個果檔係由花園街舊址搬入煙廠街，至今超過十年，可以話係老字號檔，以賣水果為主，間中都有少量瓜菜賣，檔主李女士推介其中較為搶手嘅魚翅瓜，暫時係呢度至有喳！ (老字號果檔6號舖)
魚翅瓜要夏天至盛產，但家陣喺呢度已經可以率先食到，呢款魚翅瓜瓜皮綠白色，呈圓球形，主要嚟自新西蘭，每斤$8。
李女士手上揸住嘅魚翅瓜大概五斤零重，四十零蚊有交易。將魚翅瓜隔水蒸至半熟後即可以起出一絲絲嘅瓜肉，可以滾湯或扒瑤柱豆腐，清爽而又唔肥膩。
呢檔嘅木瓜主要係馬來西亞入口，係全個街市中最平，每個重約3斤零都只係$10，可謂抵食夠大個，其他檔口則賣$4-$5斤。
李女士話要知木瓜靚唔靚至緊要睇吓果蒂唔好有腐爛，而木瓜表面無斑點，輕按果皮有彈性就靚，而肉色金黃色就表示食得，唔好擺太耐，否則唔好食㗎啦！
呢個檔口嘅檔主係一名肥仔，佢怕醜不願透露姓氏。呢度主要以賣舊橙為主，而且重係唔大唔賣，啲舊橙又大又靚，食落又甜美，送禮或自食都啱。
(賣橙果檔9號舖)
左手揸住嘅係56裝大橙，來自美國，橙皮橙黃色，$12/4個；而右手較橙紅嘅呢款橙則係嚟自埃及，Size比美國橙略細三分一，$10/6個。前者皮會較薄，而後者則會較甜，各有優點。