隔晚美股碌低，納指散3.3%，標普挫1.6%，杜指跌1.1%。睇吓港市相關美股Put輪有乜變化，按道理應該隻隻好威。
納指Put輪得件9214，真奇怪，唔升反跌，收26仙，跌3.7%，得55萬份易手，銀碼夠買1架日本車。隻輪明年3月到期，溢價3.6%，槓桿率27倍。應升而唔升，可能代表納指已經或差唔多跌夠。
標普Put輪得件9162，升11%，收30仙，不過只有1萬份易手，金額係3張金牛。今年10月到期，溢價3.5%，槓桿率8.5倍。
杜指Put輪有3件，主角9213，升5.3%，收19.8仙，有1球易手，金額可以買1架日本車。明年6月到期，溢價9.9%，槓桿率74.5倍（冇寫錯）。
3隻美股Put輪都冇大升，如果咁嘅現象係有啟示性嘅話，則美股短期展望唔會太曳。
上邊3件Put輪，一啲都唔貴，不過如果美股唔再跌嘅話，輪價亦都冇法子升。遲吓啦，等美股升番咁上下，諗住有回吐之時，再打佢哋嘅主意。